Čállingilvvu teavsttat

Čakčabeaivi

Lean vuojašeamen biillain dan fiinna čakčabeaivvi, visot lastát  juo gahččan muorain.

Hui veahá muohta, dego meliisajáfut livčče boskuhuvvon eatnama ja luotta nala.

Beaivi báittaša badjel vuomi.

Mus livččii dábálaččat illu ja mokta gorudis dakkár beaivvi, muhto liikká ii leat.

Lea juoga mii deaddá mu, unohis dovdu.

Jurddašan du ruškes čalmmiid birra, du evttotkeahtes ráhkisvuođa ja ilu juohke deaivvadeamis.

Du giitevaš ja oskkáldasvuođa.

Ipmirdan manne du lávejit lohkat, "olbmo buoremus olmmái"  Don it gávdno šat <3.

 

Čálli ii hálit almmuhit namas.

 

 

Dát jahki. Fargga nohká maiddai dát jahki. Gosa šadde beaivvit, vahkut? Árrageasi leimme isidiin muorrasárgás njeaidime muoraid, boaldinmuorran boahttejahkái. Dahje maŋitjahkái. Ean ollen sárgái njáskat. Dál leat borgon dohko. Dát ártegis jahki go in šaddan murjet, lubmet. In guliid bivdit. Livčče leamaš vaikko man buorre dilli ovtta čuvges, galbma geasseeahkeda vázzilit meahccái saháin ja njáskat dan moadde muora. Jeđđen iežan. Gal dat orrot doppe muohttat vuolde. Mun gávnnan daid fas giđđat.

 

Čálli ii hálit almmuhit namas.

 

 

Dearvvašvuođaguovddážis áhči guoimmuheamen. TV šurrá duogábealde ja olgun árvvaša. Áhčči váiban čalmmiiguin viggá čuovvut máilmmi dáhpáhusaid. Otne vuorddaša iežas miela miel sáddaga "landsskytterstevne". Ieš ovddeš čeahpes báhčči, ja diehtá mii gáibiduvvo. Son lea sotnan seŋgii, dávda loaktán su. Jienajávoheamit son velohallá, čalmmit ain ohcalit eatnán gova mii heaŋgá seainnis. Latnja maid čiŋahuvvon mánnálaš sárgosiin su nuoramus mánáidmánáin, váimmut golliin ruoksadin ja gasku čállojuvvon ÁDDJÁ. Fáhkka áhčči veahki dárbbaša, gaikkeha bátti vai veahkki boađášii. Áigebodda gollá, ii oktage boađe, ja son mášohuvvá, loahpas rivgu deašiha. Hállá vuollegit ruoŧagiela ja áhčči viggá dadjat juoga muhto jietnabáttit eai doaimma. Rivgu lea aŋkke loahpas ádden su dárbbuid, son hállá já hállá, sánit šaddet sátnin almmá sisdoaluin áhččái. Maŋŋelaš borramuš fállo, ja mális biddjo beavdái, áhčči gákkastuvvo čohkkut seaŋgaravdii. Su gieđat hoalddahuvvon ja juohke lihkastat gáibiduvvo sus návccaid mat eai leat šat, ja son váibá, baste ii loktan šat, dárbbaša veahki. Vehá áigge geažes rivgu finada su geahčasteamen, jearrala ruoŧagillii dárbbaša go maidege. Jávohisvuođain geahččá sutnje, čilgen sutnje, ja son bárdá oaivvi. Áddehallan divššára ja buohcci gaskka ii čielgan jus ii livččii dulka. Báhcá millii ahte divššu deháleamos oassi lea báhcán - gulahallan divššára ja buohcci gaskka. Sámegilážis amas giella lea váldogiellan, eat leat juksan dobbelii ovddidit dárbbuideamet. Guhkes beaivi šaddá eahkedin - nie mannet beaivvit.

Čállán: Britt Hansen

 

 

Bures,

Dál lean boahtán Finnmárkui – viimmat! Finnmárku lea mu nubbi ruovttubáiki Norggas; mun lean bargan dáppe 2011 ja 2012 huksensajis. Dán háve lean mannan Finnmárkui fatnasiin; vuoján ruoktot biillain. Dáppe lea ollu fiinnis oaidnit. Ievttá beaivvi lean vuodján Čáhcesullos Áltái. Lean oaidnán oktonas bohcco, mii vuojai Lágesvuonas. Mun lean govven ollu, ja govven eambbo vuojidettiin ja imaštalan. Finnmárku lea majestehtalaš. Lea golggotmánnu, ja lea muohtti juo. Mun ráhkistan Finnmárkku – go lean ruovttus, áibbašan Finnmárkui, ja go lean Finnmárkkus, áibbašan Oarjeriddui.

Gulahalle!

Čállán: Annette Nebelung

 

 

Boazosámi máná ja studeantta jurdagat skábman leat eksámenat, čállosat mat galget sisa ja olu deaivvadeamit. Lea maid gárddástallan- ja johtináigi, muhto studeantta riehpu ferte čohkkat skuvllas ja bargat bivastat gállui. Váikko vikkan čállit, lohkat ja bargat nu ollu go sáhtán, de jurdagat leat áibbas eará sajis go filosofalaš čállosat ja fágaloggaid hábmet. Lea álo áibbašeapmi beassat ealo lusa, doppe oažžu terapiija ja beassá oanehaš botta vajáldahttit árgabeaivvi hušša. Vaikko in beasa searvat boazodoalu bargguide ja oažžut makkárge terapiija, de ferte varas čielge- ja márfemális dohkket jeđđehussan.

Čálli ii hálit almmuhit namas.

 

 

 

"Gullo! 
Jietna lokte.
Jietna muitala.
Jietna čuvge.
Gullot
gii don leat.
Jietna jeđđe.
Jietna čatna.
Jietna doalvu
ja
oláha.
Gullo beroštupmi.
Gullot
don.
Don leat jietna.
Jiena haga
it leat
mihkke.
Jienát ja gullo!"
 

Čálli ii hálit almmuhit namas.

"Olbmážan.
Moráštan.
Duvle lohpidit,
movttidit.
Njávkkastagat ja moji boktin.
Báhcán dušše muitu.
Guođi, guođi.
In oláhan.
In veadján.
Vuollánan.
Vuorddán.
Čárvvun lohpadusas.
Vajalduván ja dohkkehan.
Ohcálan.
Vuorddán.
Okte deaivvat mu.
Doaivva ja illu.
Min stuora
beaivváš."
 

Čálli ii hálit almmuhit namas.

 

"Guhkkin,
njavggodan čuorvvasmearkkat.
Mii lei ikte?
Lea go odne?
Vai lea go ihttin dál?
 
Guhkkin,
dobbelis.
Heavahan čuorvvasmearkkaid
speajaljávrriide.
Og dál soittii odne.
Vai lei go ikte?
Soittii ihttin?
 
Guhkkin,
jaskatvuođas.
Eret gáržadasas.
Odne ii dárbbaš jietna.
Jus ii lean ikte?
Soittii gal ihttin?
 
Guhkkin,
gasku suonjardeami,
buollašiin sallalaga,
biekkaid fárus.
Seammá leaš odne!
Dahje ikte?
 
Guhkkin,
eret čuorvvasmearkkaid šordomin,
caggamiin.
Odne eai gullo.
Vai ikte go eai veaddán?
Eai hal ihttin ge gal huikke
dáppe guhkkin."

Čálli ii hálit almmuhit namas.

 

"Studeanta juovlaDovdu"

 

Čohkkán girje guba siste, logádan ja illudan juovllaide.

Juovladovdu lea lahkanan go vuosttaš eksamen lea váldon.

Eksámenis čohkkájin, čállen ja mandariinnaid borádin ja illudin dušše geargat.

Viimmat bođii juovla dovdu ja illudan beassat fargga vuoiŋŋastit.

Bálggis lea ain moalkái ja guhki juovllaide, go ollu girjjit ain leat lohkat.

Mášohalan go dieđán ahte bohtosat, garra barggus leat boađe boađi.

Giddalagaid bohtosat ja juovlabasit, leat lahkoneame mat addet duppal ilu.

Man hávskkes ja mávssolaš juovladovdu, mandáriidna hájain.

 

Čállán: Risten Marie M. Buljo